【影音之路】 之 初燒編 (第1期 2003至2008)

話說入坑之後一段時間都沒有真正燒起來，由於當時收入不穏定，工作時間長，以至對音響系統沒有多大要求。及後因為轉到新工作環境，收入穩定下來，也有獨立生活空間，條件理想下，當然希望有新的娛樂設施，於是乎開始了新一輪的發燒經歷。

多聲道系統：影音分家後，用 Dynaudio Audience 52SE 作前置喇叭。

由於當年流行家庭影院，心想只是簡單地建構起多聲道系統呢，於是上網搜尋資料，再購入當時比較流行的入門影音產品，計有 SONY 29吋平面電視、Philips DVD963SA DVD/SACD機、YAMAHA 6.1聲道擴音機、Mirage Omni 系列喇叭以及 YAMAHA 超低音等等。起初之時也覺得效果很好，而且能夠真正擁有一套影音系統，還有了舒適的生活環境及娛樂享受，但理想還理想，現實是這套家庭影院比不上真正的兩聲道音響系統，於是發燒的狀況又再出現，進而踏上真正的發燒之路。

多聲道系統：Mirage 後置掛牆喇叭

正當考慮入手兩聲道的時間，剛遇上 MF 大減價，於是便敗了 MF A308CR 前後級和 MF Tri-Vista 21 解碼，用回當年的 NEAR 座地喇叭，多聲道和兩聲道共用，感覺上比 YAMAHA 好了很多，但明顯太舊的喇叭跟不上，又要考慮入手新喇叭。但既然發燒，當然要搵番個心目中發燒嘅喇叭啦！Dynaudio 就係小弟多年心怡嘅品牌，正好又可以夾到之前買嘅 MF，以當時價位嚟講，Contour S3.4 就係不二之選。兩聲道喇叭到齊後，又再買埋 Contour SC 中置和 Audience 52SE 做後置，實行全套 Dyna 開聲玩 5.1 聲道影院。玩得家庭影院，最好當然玩埋大銀幕，跟著入手 Epson 投影機，玩 80吋大螢幕，超低音換埋 Velodyne DD12，當時真係爽到爆。

兩聲道系統：Dynaudio Contour S3.4、MF A308CR、Audio Note M2、SONY SCD-XA9000ES

不過始終兩聲道和多聲道混雜在一起，會影響兩聲道表現，於是索性用哂成個廳嚟玩，橫擺多聲道、直放兩聲道，變成影、音分家，又燒多兩度。影音分家碟機唔少得，而心目中覺得 SACD 比較好，所以便買了當時的 SONY 旗艦 SACD 機 SCD-XA9000ES，之後又身痕玩埋 Audio Note M2 膽前級，玩粒、膽雙修。跟著落嚟又玩電處、又玩線、又玩墊，幾乎乜嘢都玩，只不過好境不常，玩了幾年後經濟又面臨困境，要大屋搬細屋，又要將大部分嘅音響器材賣走，只保留部分喇叭，以及換購比較簡單嘅器材，過回低燒的日子。

後話：初燒同剛開始接觸音響有所不同，初燒係會知道自己的情況，要對正下藥，反而剛開始接觸時會被某些事情吸引，但好可能分不清推進方向。所以初燒最重要係認清楚自己方向，認識自己反比認識器材重要，認識器材可以重各種資訊渠道獲得，反而認識自己需要長期累積經驗。

註：睇返第一期同第二期中間，點解好似少咗幾年嘅？
答：睇返喺08年之後低燒咗幾年，相信大家都會明白哪些年的日子是怎樣過！

【影音之路】 之入坑編 (第0期 由求學時期開始)

故事發生喺小弟求學時期，當時社會冇乜娛樂消遣，而小弟大多數時間都係聽廣播電台收音機，當時正開始流行播粵語流行曲，小弟亦深受影響。除著有些少儲蓄後，於是買了第一部手提卡式機，聽精選卡式錄音帶，音樂之路便開始了。

當年中學時期，認識了對聽歌同樣有要求的同學，漸漸地對音樂重播系統有些少要求。由於購買能力有限，只能自組音響系統，因得到該同學幫助，於是便開始自己砌起擴音機及喇叭。但音響系統始終需要有音源設備，所以只能游說父、兄出資購買，既然有人出資，當然要玩埋黑膠唱盤，這樣結果就有了座台卡式錄音機及黑膠唱盤系統了。當陣時，必然會問同學借黑膠唱片返嚟錄歌啦，錄吓錄吓，又幫咗好多同學錄帶，結果好多時星期日成日都喺屋企度錄歌、過帶。

到剛開始從事工作時，原先帶小弟入坑的同學，開始買入正式的音響器材，小弟有幸得他栽培下，收了他的二手 ADCOM 合併式擴音機，加上當時儲足彈藥來購買的二手 NEAR 座地喇叭，再加上之後入手的 Philips CD機，整套系統便完整滿足。該系統用了超過十年以上時間，正值青春，消費增多，發燒熱情已減，但聽歌閑情也沒有改變，畢竟當時買音響也是以聽歌為主，發燒只係點到即止。

而小弟的第一套家庭影院系統，都是由剛開始工作後和兄長合資購買，系統計有東芝火箭炮大電視、PIONEER LD 碟機、YAMAHA 5.1 AV 擴音機、ENGERY 二路書架喇叭、Mirage 中置、JBL Control 1 後置等，當時租 LD碟睇戲，便成了日常週末及週日娛樂。

註：小弟 DIY 都有幾部機，第一部係 IC式放大電路套件成品，買返嚟已經可以開聲，也沒有整機殼，好快便壞了，變成單聲道，因為成本低，所以又買了另一部 AB類擴音機。由於當時同學可以幫手砌機殼，於是就開始著手做新的擴音機，一部做畀自己，一部做畀同學，當然部機好快又壞掉。不過唔緊要，由於自己的技術有所提升，又開始計劃將新套件改裝，做成電源分體式合併機畀同學，加強了電源部分，將套件發揮得更好。但⋯同廠機比，便比下去，好在有高人指點，將分體電源改回同一箱體，於是乎⋯同學聽得好開心，因為聲音實在唔錯 (以當時後生，聽音響經驗不足計)。之後，因為這次成功經驗，小弟又開始砌對稱式 FET 前級和平衡式 A類後級，因為屋企要搬屋原故，經歷了很長時間才能完成，但完成後十分滿足，因為聲音比之前嘅機實在好太多。但好景不常，同學的合併機被盜，之後因為工作收入，買了廠機後也不需要使用 DIY 器材，而該廠機好快便賣給小弟，佢就升級到 MF A1 鐵板燒。

【影音之路】 之器材編 (第2期2012至2014)

前言：過時過節，有機會都會整理一吓以前嘅嘢，今次回顧以往喺 Post76 內嘅資料，原來以前自己都係以寫器材為主要內容：jackt 敗家仔 影音組合 (#Update 2013-12-28#) (出處: Post76影音玩樂平台)

第2期 開始嘅時候…

以前組合：DYNA 52SE + PIONEER LX81 + CA 650BD
一個簡單聽歌睇戲組合，漸漸地發現聽歌很生硬又沒有層次，所以希望加入新成員改善兩聲道播放，而開始咗一連串敗家行動。(註：這是2012年以前的組合，自從由200尺玩嘅地方搬到120尺可玩嘅地方，開始嘅第一套組合。)

2012-6-2 之後..

敗OLIVE 4HD
睇咗一輪 Forum Post 後，發覺好多人玩CAS，自己雖然係IT出身，但總覺得玩CAS好花心機時間都玩唔好，最後發現一部容易玩又簡單慨產品。開始時想入咗啲舊嘅CD，但入入吓反而無乜時間聽歌，就慢慢無入歌（其實係懶），然後開始慢慢聽機。部機都唔錯，四平八穩，聲音中性，但感染力不足，唔夠細緻。可能係用AV機來出兩聲道，所以要尋找兩聲道AMP。

敗KRELL S300i
Search咗一輪，好多人用KRELL夾DNYA，而KRELL最平合拼機只有S300i，但係由祖國制造，不過點都係KRELL出，應該無問題，一於去馬。用咗KRELL後，發覺真係好夾，馬力充足，動態強勁，不廢吹灰之力已經張52SE打通，低頻遍佈整個100尺廳，真係唔講得笑。S300i聽起來都不像人家說太硬或太乾，分析力足，除了不夠細緻和有些少噪音（只係調Volume時）樣樣都有板有眼，不過有趣地方係接LX81做Proceesor返而仲好聲，但後來發覺應該係家居環境不理想而導致單用S300i播歌比LX81差（其實差好少），所以又開始想房間修正方案。

敗ONKYO 5509
年頭見Forum各位兄弟力讚ONKYO 5509前級，而又有我最想要嘅AUDYSSEY最新房間修正系統，所以決定敗入。可能有人會覺得好奇怪，點解會用部AV機做前級，但我覺得唔需要理佢多聲道或兩聲道，好聲便足夠，兼且連多聲道也授惠，的確係一個好選擇。Set好部5509後先發現原來聽少好多嘢，細緻度、分析力、音場、聚焦都好好，可能係未煲夠，有些少燥及乾。（意外地連VIDEO也改善很多，開頭只係顧住聲音部分，但原來畫面都唔錯）

敗二手MARANTZ SA7S1
哩部係唔小心在HIFI舖發現，當時想問吓CD機意見，點之有部二手SA7在，聽聽先，簡直完全兩個世界，HI END嘢的確係Hi嘢，而且價錢仲好好，虛榮心起，搬返屋企。哩件嘢好勁，太座都話係（“真”得好利害，人聲後面吉他手彈弦時力度的回音都聽得好清楚），無話可說，Best Buy。
～～本來太座好少聽歌，先前有少少問題，所以叫佢聽多啲睇有冇事，依家仲搵咗好多舊CD聽～～

敗ENTREQ 大地匣
前晚到，末聽有乜分別，煲吓先。

Antelope OCX主時鐘
本來以為馬仔已經好好聲，點知原來加咗鐘可以更上一層，立體感一流，好似睇緊3D電視一樣。

2012-11-22 之後…

今次有兩位新成員加入。
第一位係代替用咗多年嘅52SE，入哩對嘢考慮咗好多唔同嘅選擇，價格、聲音同外觀都係考慮因素，又要過到太座關，真係十分不容易，而哩對喇叭一對非常容易入屋嘅小座地 Audio Physic Sitara 25。第二位係替代 LX-81 當七聲音後級的 NuForce MCH300-C7，一早已有用多聲後級的打算，但奈何銀彈缺乏，只可等儲到才買。當中亦考慮過唔少機種，但因為要放到地方淺窄嘅環境中，只有搵一啲薄身嘅後級，太大部係冇乜可能，見到這部 MCH300-C7 就無問題，而且效果又唔錯，一於去馬。

Audio Physic Sitara 25
對喇叭都用咗差不多有半年，表現都算唔錯，低頻不會很出，但中高十分之好，管樂弦樂都處理得宜，始終地方細，容納不到更多的低頻，所以現時剛剛好。

德國人由細聽古典大，交響樂絶對難唔到 Audio Physic！正正精準就係播古典重要元素，而佢又比到所要的東西給你，聽管弦樂真係好正呀！

Audio Physic 真係小型座地之王，喇叭面窄，擺位方便，外觀好看，如果在百多呎地方應該沒有更合適的選擇。注意 Classic 10 低頻只去到38Hz，如果地方大少少，可能有些不足。單以外型及音質計 Sitara 25 應該全勝，但它對空間位置有要求，沒有良好位置，它不能發揮應有水平，正如我地方一樣，離牆不足，以致音場永遠攪不好，白白浪費咗它的強大音場。

NuForce MCH300-C7
小弟第一次使用七聲道後級，初初考慮有Anthem A5, Cary 7.125同哩部，最後都因為呢部機最薄同省電，所以有得入屋。

今次真係可以用盡部5509，不過哩部NuForce MCH300-C7真係唔錯，雖然唔係SE，但聲音都好好，高度通清，快而有力，高音去得盡，低頻爽快，中頻有密度，好有HiFi效果，但可惜缺乏感情，比較乾，當然剛剛開聲不能段定。
剛剛聽Wyman隻演唱會DVD，聲音非常立體，簡單的配樂十分細緻傳神，好似聽到紅館有幾闊有幾大，弱音十分清晰，估唔加咗後級分別有哪麼犀利！

其實聽咗唔知有冇一百個鐘，但已經覺得一啲都唔乾，一啲都唔似D類，聲底仲有啲似高階機種。低頻有勁，線條唔錯，中頻有少少肉哋，不會好厚聲，高頻伸延很好，有少少高貴感。可以聽多好多嘢，尤其是演唱會，定位非常好，音樂同歌者"看"得見，弱音同微細背景聲都十分清晰。動態十分良好，環繞聲十分出色，當睇噃啲舊戲都有一番新感受，好似睇新戲一樣，可能比以前投入。音樂性同音效性並重，當駁兩聲道同樣出色，分分鐘以為係一部純兩聲道後級。呢部機取向應該係以聽歌為主，亦最啱我要求，如果你有好多演唱會、音樂碟同多聲道SACD，就要留意此機！

2013-9-18 之後…

PS Audio P3 Power Plant
以前曾經用過 PPP，用了後有明顯改變，後來借給朋友，朋友一聽後便不作歸還，直至最近看到 Jadis 大大的 P3 文章，再次想起改善供電的方案。P3 的確比 PPP 進步，但功率只得 PPP 一半，這樣不是問題，因為我只供前面的器材使用。
P3 的效果很有好，聲音更純，噪音更低，聽到更多細節，而且它不會改變原本器材的聲底，但這件器材對電源線和墊材比較敏感，大家可以見到我將 P3 放在 Symposium Ultra 上，如果沒有墊材，聲音會比較呆板。以 P3 這個價格來說，它的確是一件物有所值的產品。

2013-9-30 之後…

Mark Levinson No.326S
呢部機係七、八年前左右開發，屬於 No.32 的簡化版，同期有兩款，一部 No.320S，一部 No.326S。我相信好多師兄都知道 Mark 仔最出名係前級，小弟有幸於五年前左右聽過該產品，所以心怡已久。

起初只打算用 AV 機聽歌，但後來身痕買咗部 S300i 聽，覺得推對 52SE 十分之好，但後來發覺 52SE 已經達不到要求，所以轉了新喇叭 Sitara 25。而換喇叭就係沉淪嘅開始，可以話幾乎所有器材同線材都要換曬，可能係毒發啦，於是開始不停地加入新組合成員。因為心怡 Mark 仔，所以第一時間諗加前級，於是便買了平生最貴的一部器材 ~ Mark Levinson No.326S。

買機後有一段小插曲，新機到後，馬上駁來聽，但聲音出奇地差，心想 “唔係買錯嘢呀？"，於是長時間開機 run-in，可能會係時間的問題，但第二日發現扭到大 volume 時，左聲道有問題，便立即打電話問經銷，即晚將部機交回等待解決問題。而經銷亦立即向代理要求換過部新機，好在不需要等太耐，全新嘅 ML No.326S 已經到了我家。在此多謝 經銷及 代理的服務！ 

新機入屋，馬上駁機，好在之前的問題已經沒有了，而且發現這才是 Mark 仔的聲音，非常忠實地反映音樂的內容，細節豐富、快速瞬變、動態極大、乾淨利落、非常透明，換甚麼器材或線材，通通都能反映出來。

雖然非常滿意 Mark 仔表現，但亦可能是無間地獄嘅開始，因為聽得出細少分別，所以現有線材的問題陸續浮現，又要開始新一輪的配線時期。

2014-11-7 之後…

MSB Analog DAC
呢部DAC花咗好多時間去搵料，結果 。
話時話，最初呢部嘢真係冇乜驚喜，但聽聽吓的確又好有感情，絕對值得擁有。"
套 MSB 剛剛在家中開聲，只感覺動態大些，沒有如代理那裡的深闊音埸和豐富的細節。環境當然是最大問題，但可能有些地方已經去到樽頸位。
今日再試試換不同的電源線，現在感覺細音量都可以聽到許多細節，但聲底還是SA7的聲底，沒有添加其他味道。
所以昨晚開始比較時，我心想 “乜駁唔駁 DAC 都一樣聲㗎，點解仲要比咁多錢買呀？有啲搵自己笨喎！"
不過今早太座話："呢對鐵板燒，好 就唔係唔好，不過好似監硬令到啲聲好咗咁！" 
我就同佢講："新機都未煲好，煲好就自然啲㗎啦！" 
昨晚開始試 CAS，原用開的 Router-based Squeezelite 播 24/96 有問題，結果用了 Oppo 105 去試，都可以啦，不過冇驚喜。於是今日用部舊 Mac Mini，順利播到 384K 檔案。但今晚再幫部 105 換條 Heimdall 2 PC，再聽 24/192，現在終於明白高清檔的威力，以前從未發覺相差咁大，我可以講話好聲過 SA7 的 SACD，唔知有冇人信呢？

Accuphase A65
呢部機好似冇乜講過，因為太多金仔會嘅人，所以都冇乜嘢好講，只可以話A類同AP十分夾。

MSB UMT Plus
喺呢道又好似冇乜點講，但可以話，佢係一部好出色的藍光機，無論睇戲聽歌都有極出色的表現，如果淨係聽CD真係有啲浪費，最好就係聽藍光同SACD，相信都好難搵到第二部。

呢部機有個特點，佢可以用 SPDIF 輸出多聲道，而且這個 SPDIF 可支援 DoP，即係可以播多聲道 DSD 而不需轉成 PCM 格式。現時只有少數 Transport 可以以 SPDIF 輸出 DSD 格式，而亦只有這一部可以輸出多聲道 DSD，真真正正 Hi-End 多聲道 Transport 而且可以兼容 SPDIF 輸入 DoP 的解碼器。

回顧：
以上大部分內容來自自己之前喺 Post76 裡面嘅貼，之所以係第2期，因為之前仲有第1期和中學階段嘅時期，之後會慢慢再講第1期、第0期、和依家嘅第4期，謝謝觀看！